Heb 8 | PONPDN | STEP | A iet orlepan me se indinda: Atail samero lapalap, me kotikot ni pali maun en mol en Kaun lapalap nanlan.

Hebrews 8

1 A iet orlepan me se indinda: Atail samero lapalap, me kotikot ni pali maun en mol en Kaun lapalap nanlan. 2 lei papa en pera saraui o im likau melel, me Kaun kotin kauada, kaidin aramas amen; 3 Pwe samero lapalap karos pan kasapwilada, en kida kisakis o mairon kan. I me udan pun men et en pil kida meakot, me a pan kotin maironki. 4 Ma a kotikot sappa, a sota pan kak samero, pwe samero kan mia, me kin kidan kisakis duen kapun o, 5 Me kin alale san meakai mi lan, duen Moses, me Kot kotin kalolekonla, ni a pan kauada im likau. Pwe a kotin masani on i: Kanai on, o wiada meakaros, duen me kasansale on uk er nin nana! 6 A i me aleer papa eu, me mau san arail, pwe i kapwai pan inau, me mau san men mas, pwe a tapi san masan en inau, me mau san men mas o. 7 Pwe ma inau en mas o unsokalar, sota me pan rapaki wasa en eu inau. 8 Pwe a kotin kupur sued kin irail masani: Kilan, ni ran oko, me pan kodo, I pan ki on men Israel o kainok en Iuda inau kap eu; iei me Kaun o kotin masani. 9 Kaidin dueta inau o, me I ki on sam ar akan, ni ran o, me I koledi pa arail, pwen kalua irail do san nan sap en Akipten, pwe re sota podidi on ai inau; ari, I ap sota inseno kin irail, me Kaun o kotin masani. 10 A iet inau o, me I pan wiai on men Israel murin ran oko, me Kaun o kotin masani: I pan audeki nen arail ai kapun, o intiniedi nan monion arail, I pan wiala arail Kot, o re pan wiala nai aramas. 11 Sota amen me pan padaki on men imp a, o ri a indinda: Lelapokki Kaun! Pwe amen amen pan lelapok kin ia san ren me tikitik o lel on me lapalap re ’rail. 12 Pwe I pan makeki on ir ar sapun kan, o dip arail I solar pan tamanda. 13 Ni a kotin masani: Inau kap, a kotin kamariwala men mas o. A me marinalar o malar, me mau on lokidokila.